李晨宇 / 臺南報導2024-01-30
 

年尾，臺南社大的台江分校有辦一場台江宴，來謝平安、唸歌詩。料理班的老師和學生，用在地食材做出台江的新菜色；另外作曲班的學員，上台表演母語歌曲。毋但傳承文化，嘛共臺灣過年的氣味揣倒轉來。（這條新聞導言、標題、內文是臺語文。）
囥感情落去、共歌唱甲有感情閣燒烙，予逐家聽甲耳仔覆覆覆。這陣平均歲頭60歲的序大，唱的攏是家己寫詞、譜曲的作品。長期來臺南社大台江分校拍拚發展一村一廟一樂團，嘛開作曲的課程，通予人來學習為故鄉、土地寫歌的技巧，到今攏總粒積七百條矣。

臺南社大台江分校學員 小城綾子：「會當寫家己性命的故事，嘛會寫咱所看著的。」

臺南社大台江分校學員 蔡鼎甲：「外口生活的時陣攏講華語，重新了解臺南我的故鄉，學習家己的語言，作曲的時陣來表達家己的感情。」

臺南社大台江分校作曲班老師 陳婉菱：「一句一句按怎寫，一个音一个音按怎寫，按呢共詞填入去。其實逐家人照方法慢慢做，逐家人攏會當做出好聽的歌。」

這場台江宴主要欲謝平安、建庄兩百冬圓滿。桌頂豐沛的食物，攏是料理班的師生研究出來的台江新料理。像講有用虱目魚等海產，結合西瓜綿來炊卵，總鋪師講，這內底會當食著酸甘甜的氣味。煞尾閣捀出用柑仔蜜果乾佮紅蔥頭研發的台江平安餅，予人看甲喙瀾插插滴，有代表新年平安順勢的涵義。

大頭師 蔡瑞成：「以咱遮在地虱目魚為主，虱目魚的魚皮做的、規隻魚嘛會做的、魚餅嘛會當做，閣後壁的彼个魚丸代表圓圓滿滿。」

臺南社大台江分校執行長 吳茂成：「過一个臺灣的平安年就是按呢。逐家會當用在地的食材，來料理食咱在地的味。二來咱會使來學習為故鄉來寫歌作曲，咱過一个年其實毋是欠食，是逐家欠彼个人情味、文化味

頭一擺逐家佇古厝大埕食桌聽人唱歌詩，臺南社大台江分校執行長認為，這是文化傳承真好的方式。無論是譜出土地的聲音，抑是用料理打造在地的特色，向望通繼續共台江16寮的文化永續傳承落去。

陳稷安/編輯