發布時間：2024-07-03 19:15 
李晨宇 / 臺南採訪報導
臺南安南區的中心點有一个天馬電台，進前是中央廣播電台咧使用，自從遷走了後，遮就無閣開發。地方這十幾年來推展公民運動，毋若成立村廟樂團，嘛為家鄉寫歌，到今攏毋捌斷過。這馬也當咧連署爭取共天馬電台基地變做國家級的台語文化園區，重新共遮活化。（此則新聞標題、導言、內文皆為臺語文。）
一句一句唱出用家己的力量來譜曲的心情，舊年台江建庄兩百冬，in辦台江宴、唸歌詩，閣以「做伙來唱台江歌」辦發表會，長期來一陣人用台語寫詞、譜曲來紀錄家鄉。

臺南社大台江分校作曲班學員楊淑瑤，「不只在地人抑是外地人來這搭學琴，嘛會當共這攏寫做歌曲，就若像文字按呢，流傳落去 一代去傳一代，我嘛希望我後一代的囡仔，會當知影透過阮寫的歌詞，去了解咱這个故鄉的故事。」

臺南社區大學台江分校參海尾寮朝皇宮合作，發起「大廟興學」，這18冬來捒一村一廟一樂團，閣有作曲班，共逐家閣箍做伙，仝心守護在地的根，嘛形成台江文化運動。

臺南社大台江分校作曲班老師陳婉菱，「遮的阿公阿媽大哥大姊，ﰀ攏是毋捌音樂的人，拄仔好大廟興學有開這个作曲班，ﰀ來報名了後嘛想講，家己攏做袂出來，我會叫ﰀ去思考講，恁一定有足濟真的故事，會寫你對細漢到大漢，你參台江這片土地你有啥物連結，這就是一个足大的力量，會當共在地真正的文化，用寫歌的方式來呈現出來。」

「台江」是臺南安南區古早的名，1823年曾文溪改道，衝入內海，形成台江十六寮溼地型的庄頭。文化、生態佮語言遮攏真多元。毋過有台語老師發覺佇教學現場，母語傳承有危機，無搶救恐驚愛面對嚴重的世代斷層。

台語老師鄭忠勝，「台語課一禮拜才40分鐘，一節的時間爾爾，所以無夠的時陣，就必須愛有ﰀ佇時間外的教學，咱若佇這搭遮設一个遮好的場所，有文化、有歷史的天馬電台，佇台江內海的中心點，這搭遮就上蓋好的啊。」

天馬電台就佇台江內海的中心點，民國58年中央廣播電台台南分台起咧遮，106年正式徙走，隔轉年市府接手來招商，共土地變更做「創意文化專用區」，毋過幾若改攏無成。這馬地方有團體連署，爭取國家級「台語文化園區」，佮公視台語台總部設來遮。有學者講，這搭確實上蓋適合。

臺南社區大學校長林朝成，「臺南四百年鄭成功的輔助就是鄭芝龍等等，ﰀ彼代先攏佇臺南，對倒風內海到台江內海這是一線的，咧推動捒動就是這線愛共繼續落來，佇文化創作佇臺南攏有真大的表現，設咧佇遮會當發揮伊上大的作用。」

其實往過嘛捌有袂少人提出意見，只是見擺攏有頭無尾，市府112年共土地交轉去予中央，咱猶是愛去探討，是按怎頭仔興興，尾仔冷冷的關鍵原因。